| Ydych chi’n cael anhawster i ddarllen y cylchlythyr yma? Cliciwch yma i’w weld yn eich porwr. Rydych yn derbyn y cylchlythyr yma o ganlyniad i danysgrifiad o’n safle wê. Cliciwch yma i orffen eich tanysgrifiad. |
 |
 |
If you would like to receive future copies of this email in English, please click here. Mis yma: Beth am argraffu copi? Gallwch lawrlwytho copi PDF o’r llythyr gweddi yma yn Gymraeg neu Saesneg. Beth am argraffu copi ar gyfer eich cyrddau gweddi, neu i gadw yn eich Beibl? 
|
|
|
Diolch am weddïo dros MEC. Wrth deithio Cymru rydw i wedi cwrdd â sawl un sy’n defnyddio’r wybodaeth yn y llythyrau hyn yn eu gweddïau drosom. Bu eu gwerthfawrogiad yn hwb mawr i ni.
Gweddi a Gwaith Gydol yr Haf... Os ‘Gweddi yw’r Gwaith’, fel y tystia llawer, yna mae angen dirfawr i ni alw ar yr Arglwydd. Fe fydd nifer o resymau am ymbil ar Dduw dros ei weision yn ystod misoedd yr haf. Pregethir cannoedd o bregethau, cynhelir miloedd o sgyrsiau am Iesu Grist, a dosberthir miloedd o dractau a phamffledi. Mae angen cymorth ar bobl Dduw. Nodir isod rai gweithgareddau sy’n gysylltiedig â’r Mudiad a fydd angen ein gweddïau. 
Eleni mae tua 500 o wersyllwyr a 200 o swyddogion wedi eu cofrestru ar gyfer ein gwersylloedd. Mae her a pherygl yn y gwaith hwn. Gwirfoddolwyr yw’r holl gogyddion a’u cynorthwywyr, y swyddogion, yr arweinwyr, a’r caplaniaid. Byddant yn gweithio oriau maith cyn ac yn ystod y gwersylloedd. Rhaid iddynt fod yn effro i bob cyfle a her. Ein nod yw darparu hwyl a bwyd – yn gorfforol ac yn ysbrydol. Eisoes cyfarfu timau’r gwersylloedd i gwblhau cynnwys a threfniadau eu gwersylloedd penodol. Fe fydd caplaniad yn paratoi astudiaethau beiblaidd a’u prif negeseuon. Yn y swyddfa fe fydd prysurdeb gweinyddol, a chyn bo hir anfonir yr ohebiaeth derfynol at y gwersyllwyr.
Eleni eto fe fydd tîm MEC yn Eisteddfod yr Wyddgrug, Sir Fflint, yn gweithio gyda phlant ac yn gwerthu llenyddiaeth Gristnogol. Yn ôl yr arfer croesewir pobl i gymdeithasu a sgwrsio dros baned. Gwirfoddolwyr o eglwysi lleol sy’n darparu lluniaeth, a Christnogion o bob rhan o Gymru yn aelodau o’r tîm efengylu a fydd yn dosbarthu tractau newydd a chyfoes, ac yn rhoi cyfle i’r eisteddfodwyr glywed a thrafod yr Efengyl. 
Awst 11-18 ac Awst 20-24 yw dyddiadau’r cynadleddau haf yn Aberystwyth. Mae dros 1,300 o bobl wedi cofrestru eisoes. Edward Donnelly (Saesneg) a Sulwyn Jones (Cymraeg) yw’r prif siaradwyr. Bydd Phil Swann yn pregethu yn lle Derek Swann (sy’n anhwylus) ar nos Wener y Gynhadledd Saesneg, a gweddïwn drostynt ill dau. Dewi Tudur Lewis, Jonathan Thomas, Graham Daniels, Wyn Hughes ac Evan George yw pregethwyr yr hwyr yn y Gymraeg. Fe fydd hefyd seminarau heriol ac amrywiol ar gyfer bob oedran. Cynhelir cyrddau plant a chyfarfodydd ar rodfa’r môr yn ystod y ddwy gynhadledd. Gweddïwch ar i Dduw fendithio’i bobl yn helaeth. Swyddog Datblygu Gwaith Cymraeg Gweddïwn yn daer am arweiniad Duw wrth benodi Swyddog. Mae’r angen yn fawr yn y maes hwn. Gobeithir gwneud penodiad yn ystod y Gynhadledd Gymraeg. Ddiwedd Gorffennaf cynhelir ymgyrch ar y cyd rhwng UCCF ac Eglwys Efengylaidd Rhydaman. Mae MEC wrthi’n trefnu tair ymgyrch debyg mewn eglwysi yn ystod y naw mis nesaf. Fe fydd un yn Gymraeg, un yn Saesneg, ac un yn ddwyieithog, ar y cyd ag UCCF. Gweddïwch drosom wrth chwilio am eglwysi brwd, arweinwyr, pregethwyr, a thimau i bob ymgyrch. Dros yr haf cynhelir ymgyrchoedd ar draethau Cymru, gan gynnwys Cei Newydd, Benllech, Llandudno (gyda chyrddau awyr agored bob nos), a Bae Langland, Gŵyr. Ym mis Awst mae tystiolaeth gan y Genhadaeth Awyr Agored yn Ninbych-y-Pysgod. Bob prynhawn am 2.30 bydd ganddynt ‘Holiday Special’. Cynhelir ymgyrchoedd eraill yn Saundersfoot, Aberystwyth, Cricieth, ac efallai Sir Benfro. Mae’ch gweddïau’n bwysig – ac mae croeso ichi fod yn bresennol hefyd os oes modd. Cynhelir cwrs preswyl Saesneg ddiwedd Awst. Gweddïwch am fyfyrwyr newydd. Wedi blynyddoedd o ymroddiad di-flino mae Graham Harrison yn ymddeol fel y Cyfarwyddwr y cwrs Saesneg; Stephen Clark fydd ei olynydd. Tystiodd sawl un iddynt elwa o’r Cwrs Diwinyddol Cymraeg, sy’n dathlu chwarter canrif eleni. Mae cynlluniau ar y gweill i newid ffurf y cwrs Cymraeg o 2008 ymlaen. Mae’r gronfa hon, sy’n derbyn cyfraniadau i gynorthwyo gwersyllwyr o deuluoedd anghenus, yn dal ar agor. Fe fydd mwy na 25 o blant yn elwa eleni. Hyd yn hyn casglwyd dros £1,000 o’r £1,500 angenrheidiol, a diolchwn i Dduw am hyn. Os am gyfrannu, cysylltwch â swyddfa MEC os gwelwch yn dda. Cynhelir y Rali Flynyddol Saesneg, yn ôl yr arfer, ar Sadwrn cyntaf mis Hydref (y 6ed) yn Eglwys Libanus, Treforys, o 1:30 yp i 8:00 yh. Roger Carswell, Stuart Olyott, ac Andrew Davies fydd yn siarad. Hefyd arweinir seminarau gan weinidogion sydd yn plannu ac ehangu eglwysi. Llyfrau Newydd o Wasg Bryntirion Fis Awst cyhoeddir llyfr Ted Donnelly, Life in Christ, sy’n edrych ar un o hoff ddisgrifiadau’r Testament Newydd o’r Cristion, sef un sydd ‘yng Nghrist’. Gobeithir cyhoeddi llyfr Gwynn Williams ar ystyr y groes a’i lle canolog yn y ffydd Gristnogol – rhywbeth sy’n cael cryn sylw y dyddiau hyn – cyn diwedd y flwyddyn. Gweddïwn y bydd y ddau lyfr o ddefnydd helaeth. Gweddïwch am y staff yn Bryntirion sy’n wynebu cyfnod o bwysau ychwanegol. Mae dau aelod o staff wedi gorfod tocio’u horiau, sef Mark Barnes, sydd bellach yn weinidog ar Eglwys Efengylaidd Bethel, Clydach, a Joan Pells Cocks sydd newydd ddathlu ei phenblwydd yn drigain oed. Diolchwn i Dduw am barodrwydd aelodau eraill i dderbyn mwy o gyfrifoldeb yn sgil hyn, am wirfoddolwyr sy’n cynorthwyo yn y swyddfa, ac am eraill sy’n fodlon gweithio’n rhan-amser dros yr haf. Mae MEC yn hybu cyfieithiad Cymraeg o’r cwrs yma. Gweddïwn dros y gwaith hwn, a’r defnydd ohono yn y pen draw gan fyfyrwyr ac eglwysi Cymraeg. Gweddïwch, os gwelwch yn dda – ‘Gweddi yw’r Gwaith’. |
|
|
|
|
